Zittesj (Sittards)

Luuj, hawt uch vas. Ich woar pas in Paries. Doa kent me mit de bös alles zeen wat me mer wil. Eemes zag doa: pak de S (van Zitterd op zien huilands!). Ich gedoan. Et woar sjrikkelik werm en ich hoeb mien kammezoal doa metein oet motte trekke, de tesj in, die ich altiet bie mich höb es ich urgens hèr mot. Jezzes kenger noch aan toe: kump die bös, en kense bienoa neijt insjtappe, zo völ luuj doa, gans angesj es bie õs toes! En denkste dat 't doa bie blif? Ich goa doa zitte en dan zeen ich veur mich, ech Paries, unne clown of zo, mit un tröt van enne nek, en oppe kop enne houwt es of et un oet de handj geloape sjief woasj is, me dan veijer keer zo breijt!

De kèl begint ennens te sjreve. Ich kiek, en wat zeen ich: e vroumesj nèvenum die oetsjtappe moosj haw um op zien klawe getrap. De vlègel, troane mit tüte, noa un vriegekomme anger plètsjke.

Effe later -de conducteur zag dat ver moosjte oetsjtappe- koame ver de kèl weier tège. Hè droag enne wentjerjas (Augustus, môste dich veursjtelle!) en enne angere Parizenèr of zo pakte um vas en wees um op e gaat in dèh jas woa, zo te zeen, unne knoap aaf woar. Dat kris ze allemoal in Paries te zeen. Te gek veur weurt!